Hazırda yaşadığımız əsr kompüter əsri olub həyatımızda bir çox sahələri asanlaşdırdığı kimi, bir sıra şeyləri də bizim üçün zəruri etdi. Bunlardan biri və məncə ən önəmlisi ingilis dilinə yiyələnməkdir. Belə ki, bəzən yüksək gəlirli bir işi sırf ingilis dili bilginiz olmadığı üçün əldən verirsiniz. Bəzən isə məktəbli, tələbə və hətta iş adamı olmağınızdan asılı olmayaraq sizə hər hansı bir mövzu və ya məfhum haqqında araşdırmaq,bu barədə bütün vacib bilgiləri mənimsəmək, bu haqda videolar izləmək lazım gəlir. Və nəzərə alsaq ki, mövcud faydalı internet resurslarının əksəriyyəti ingilis dilindədir,bu dili öyrənməkdən başqa çarə qalmır.
Bəs ingilis dilini necə öyrənməli,hardan başlamalıyıq?! Bu məqalədə sizlərə ingilis dilini öyrənərkən diqqət etməli olduğumuz bəzi məqamlardan bəhs edəcəm.
- Əziz məktəbli,tələbə,iş adamı və ya dil öyrənənlər ! Birinci qızıl qayda bu dilə bir fənn kimi deyil,məhz bir vərdiş kimi yanaşmağınızdır. Bəli,bəli,düz eşitdiniz!İngilis dili bir vərdişdir, həyat tərzidir. Əgər bu dili ən qısa zamanda öyrənməyi planlaşdırırsınızsa, oxuduğunuz kitablar,sosial media hesablarınızda izlədiyiniz səhifələr, baxdığınız video və filmlər,dinlədiyiniz mahnılar ingilis dilində olmalıdır. Bir sözlə, özünüzü bu dil ilə əhatələməlisiniz.
- Digər bir önəmli məsələ dil səviyyənizə uyğun olaraq hərəkət etməli olmağınızdır. Filmlər izləyib, musiqi dinləməklə dil öyrənmək sözsüz ki,qulağa xoş gəlir. Ancaq, bu dediklərimdən ingilis dilində müəyyən qədər bazası olan və dil bacarıqlarını daha da inkişaf etdirmək istəyənlər faydalana bilər. Təəssüf ki,dil səviyyəniz “starter” və ya “elementary” olduğu təqdirdə, bunlar sizin motivasiyanızı aşağı düşürməkdən başqa bir işə yaramayacaq və nəticə etibarilə siz ingilis dilini elə başladığınız kimi də bitirəcəksiniz. Bu dil ilə daha öncə heç bir tanışlığınız olmayıbsa, yeni başlayanlar üçün nəzərdə tutulmuş kiçik həcmdə və sadə dildə olan video-roliklər, cizgi filmləri və bu tip sadə dinləmələr sizin çox işinizə yarayacaqdır.
- Bu işin bir başqa sirri dil öyrənmə prosesindən həzz almağınızı təmin etmək, başqa sözlə desək bunu əyləncəli hala çevirməkdədir. Təsəvvür edin ki,siyasət haqqında düşünəcəyiniz ən son mövzudur və sizə ingiliscə siyasi videoların və ya yazıların paylaşıldığı bir sayt önərirlər.Təbii ki,bu sizə çox sıxıcı gələcək və tezliklə bezib,həmin saytı bir daha geri qayıtmamaq üzərə tərk edəcəksiniz. Uzun sözün qısası, müəlliminiz və ya dil öyrənməyinizdə sizə yadımçı olmaq istəyən qeyri bir şəxs sizlərə bir çox onlayn platformalar və ya resurslar məsləhət görə bilər. Ancaq siz,bunların içərisindən maraq dairənizə uyğun olanlarını seçib irəliləməlisiniz. Əgər texnologiya, sağlamlıq, fitnes və s. bu kimi mövzular sizin üçün maraqlıdırsa, bu barədə videolar izləməyə,bloqlar və ya yazılar oxumağa çalışın.O zaman sevdiyiniz bir şeyi etdiyiniz üçün ingilis dili öyrənirmiş kimi deyil, əylənirmiş kimi hiss edəcəksiniz.
- İngilis dilini öyrənərkən diqqət etməli olduğunuz və bəlkə də ən mühüm məsələ dinləmədir.Yəqin ki,çoxunuz ingilis dilində sözlərin yazıldığı kimi tələffüz olunmadığından xəbərdarsınız. Və bunun üçün altyazılı video və ya filmlər izləmək idealdır. Belə ki,altyazı ilə bir video və ya film izlədikdə, hansı sözün necə deyildiyini öyrənmiş olursunuz.Ən əsası isə tələffüzünüzlə paralel olaraq dinləmə və danışıq bacarıqlarınız da inkişaf etmiş olur.Unutmayın ki,altyazı ilə izlədiyiniz bir videoda pauzalar edib,deyilənləri olduğu kimi təkrar etmək zəruridir və yalnız bu şəkildə ingilis dilinə xas səsləri mənimsəyib, dil daşıyıcıları kimi danışığa yiyələnə bilərsiniz.Sonda isə mütləq eyni videonu bir dəfə də altyazısız izləyin və bu texnika sizə dinləmənizdə böyük irəliləyişlər əldə etməyinizə kömək edəcəkdir.
- Davamlılıq və səbir bir çox başqa sahələrdə olduğu kimi, ingilis dilini öyrənmək prosesində də olmazsa olmazımızdır.Bir çox hallarda bu dili öyrənmək istəyən şəxslər böyük səbrsizlik göstərir və bəzən sırf bu səbəbdən də yolun yarısından qayıdırlar.Nəhəng lüğət bazasına malik ingilis dilini 2 aya öyrənəcəyini gözləyən məktəbli,tələbə və ya qeyri dil öyrənən 2 ayın sonunda bu dildə hələ də səlis danışa bilmədiyi üçün məyusluqla yelkənləri suya endirir. Lakin nəzərə almalısınız ki,2 ay ərzində bu dili öyrənmək qeyri-mümkündür.Yalnız,bu müddət ərzində böyük çalışqanlıq göstərərək, ingiliscənizdə kifayət qədər irəliləyiş əldə edə bilərsiniz.Ona görə də səbirli olun və davamlılıq prinsipini qoruyun. Ona görə də mütləq şəkildə hər gün bu dildə oxuyun və dinləyin. Unutmayın “Dərin olan quyu deyil,qısa olan ipdir”.Hər birinizə uğurlar!
